မစ္ဆရိယ ငါးမျိုးနှင့် ရောက်လေရာဘဝ

ကိုယ်ရသလို သူတစ်ပါး မရစေလိုခြင်းကို မစ္ဆရိယလို့ ခေါ်တယ်။ မစ္ဆရိယငါးမျိုးရှိတယ်။ ယင်းတို့မှာ

၁။ အာဝါသမစ္ဆရိယ== အဆောက်အဦး ကောင်းကောင်းဖြင့် ကိုယ်သာနေလိုပြီး အခြားသူများကို မနေစေလိုခြင်း။

၂။ လာဘ မစ္ဆရိယ== ကိုယ်သာ လာဘ်လာဘ စီးပွားဥစ္စာ ပေါများလိုပြီး အခြားသူများကို မပေါများစေလိုခြင်း။

၃။ ကုသ မစ္ဆရိယ == ပေးကမ်းထောက်ပံ့နိုင်သော ဆွေမျိုးများ၊ ဒကာများအား အခြားသူများထံ
အသွားအလာ မရှိစေလိုခြင်း။

၎။ ၀ဏ္ဏ မစ္ဆရိယ == ကိုယ်ထက်သာသူ၏ ဂုဏ်ကျေးဇူးကို မချီးမွမ်းနိုင်ခြင်း။

၅။ ဓမ္မ မစ္ဆရိယ == တရားသဘောကို မိမိသိသလို သူတစ်ပါးကို မသိစေလိုခြင်း တို့ဖြစ်ပါတယ်။

ထိုငါးမျိုးတို့တွင်

(၁) အာဝါသမစ္ဆရိယနှင့် သေလျှင် ထိုစွဲလမ်းရာ အဆောက်အဦးထဲ၌ ဘီလူးသော်လည်းကောင်း၊ ပြိတ္တာသော်လည်းကောင်း ဖြစ်တတ်သည်။ သို့မဟုတ် လောဟကုမ္ဘီငရဲသို့ ကျတတ်သည်။

(၂) လာဘမစ္ဆရိယ နှင့်သေလျှင် ဘီလူးသော်လည်းကောင်း၊ ပြိတ္တာသော်လည်းကောင်း ဖြစ်တတ်
သည်။ သို့မဟုတ် ဘင်ပုပ်ငရဲသို့ ကျတတ်သည်။

(၃) ကုသမစ္ဆရိယကြောင့် ယခုဘ၀မှာပင် သွေးအန်ပြီးသေရတတ်သည်။ ဖြစ်ရာဘ၀တွင် လာဘ်လာဘ ရှားပါးတတ်သည်။

ဗုဒ္ဓလက်ထက်က ဘုရားအမည်ခံသိဉ္စည်းဆရာကြီးနှင့် နိဂဏ္ဍနာဋပုတ္တ တိတ္ထိဆရာကြီးနှစ်ဦးသည် သူတို့၏လက်ရင်း တပည့်များ ဗုဒ္ဓ၏သာဝက ဖြစ်သွားသောအခါ ကုလ မစ္ဆရိယ နိုပ်စက်မှုကြောင့် သွေးအန်၍ သေကြရတယ်။

( ၎) ၀ဏ္ဏ မစ္ဆရိယကြောင့် ဖြစ်ရာဘ၀တွင် အဆင်းမလှခြင်း ဖြစ်တတ်ပြီး။

(၅ ) ဓမ္မမစ္ဆရိယကြောင့် ဖြစ်ရာဘ၀တွင် ဆွံ့အခြင်း ဖြစ်တတ်သည်။

ဓမ္မ ဒဿနလေး တစ်ခုရှိတယ်။ “ရဟန္တာတိုင်းလည်း ဘုန်းမကြီး၊ ဘုန်းကြီးတိုင်းလည်း ရဟန္တာ မဟုတ်” ဟူသော ဒဿနလေးပင်ဖြစ်တယ်။ အရင်ကဆိုရင် ရဟန်းတစ်ပါး ဘုန်းကြီးရင် ရဟန္တာလို့ပင် ထင်တတ်ကြတယ်။ ကြည်ညိုသဒ္ဓါပွားများကြတယ်။ အမှန်ကားပုထုဇဉ်ဖြစ်ရင်လဲ ဒါနရှိခဲ့လျှင် ဣဿာမစ္ဆရိယကင်းခဲ့ရင် ဘုန်းကြီးတာပဲ။ ရဟန္တာပင်ဖြစ်ပါစေ ဣဿာမစ္ဆရိယ အားကြီးခဲ့သူများကား ဘုန်းကြီးဖို့ နေနေသာသာ ဆွမ်းပင် နပ်မှန်အောင် မဘုဉ်းပေးရဘဲ ပရိနိဗ္ဗာန်စံသွားသော ရဟန္တာများလဲရှိတယ်။

သာဓကပြောရရင် ဓမ္မပဒ အဌကထာမှာ “ လောသကတိဿမထေရ် ” ပင်ဖြစ်တယ်။ ဒါကြောင့်မို့ မိမိတို့တစ်တွေလည်း စားဝတ်နေရေးအတွက် သွားလာရုန်းကန်ရင်း ကိုယ့်ထက်သာတဲ့သူအပေါ် ၀မ်းမြောက်ဝမ်းသာ မုဒိတာ ဖြစ်ပြီး ကိုယ့်အောက်နိမ့်သူအပေါ် သနား ဂရုဏာ ထားနိုင်ကာ တစ်ဆင့်ပြီးတစ်ဆင့် ရရောက်နိုင်တဲ့ မဂ်ဉာဏ်၊ ဖိုဉာဏ် နိဗ္ဗာန်ကို မျက်မှောက်ပြု ခံစားနိုင်ကြတဲ့ သူတော်ကောင်းတွေ ဖြစ်ကြပါစေ။ ။

{မေတ္တာရှင်(ရွှေပြည်သာ) ၏ မေတ္တာဖြင့်စီးပွားရှာခြင်းမှ ကောက်နုတ်ဖေါ်ပြပါသည်။}